|
|
| العاب اون لاين: العاب بلياردو | العاب سيارات | العاب دراجات | العاب طبخ | العاب تلبيس |العاب بنات |العاب توم وجيري | العاب قص الشعر |
|
للشكاوي والاستفسار واستعادة الرقم السري لعضوية قديمة مراسلة الإدارة مراسلتنا من هنا |
|
|
|
|||||||
 |
|
|
أدوات الموضوع |
التقييم: 
|
انواع عرض الموضوع |
|
#1
07-01-07, 02:04 PM
|
||||
|
||||
جنط السفينة وأبوهتون في الاتجاه المعاكس
بسم الله الرحمن الرحيم
السلام عليكم ورحمة الله وبركاته اعزائي المشاهدين نحيكم في برنامجنا الجديد الاتجاه المعاكس ( مناقر الديتسه ) ومعي ديتسين قصدي ضيفين عزيزين على قلوبنا وهم العضو المنتدب لشركة الاتصالات السعودية السباك ابوهتون هيه هيه لحظة وقف التصوير ياقرقيز وش قاعد تسوي يابوهتون الله يهديك ترى مانب مقدمك مصارع ابوهتون : ولا شي بس حبيت استعرض عضلاتي علشان أبين للمشاهدين إن الشركة قوية وهذا يبي يصيرشعار الشركة الجديد ابونديم : امحق قوة تسان هذي عضلاتك عموماً نرحب بالضيف الثاني جنط السفينة احد أقوى المعارضين لوجود شركة الاتصالات السعودية في السعودية >> اجل وين تبيها تصير بالسودان ياجنط فاصل إعلاني ثم نعود خلوكم معنا إذا كنت تعاني من الإمساك وتبي اليونه لا تأكل المعلبات وخصوصاً التونه وعليك بالخضار مفعولها معروف مثل الكوسه والقرع والملفوف خضارنا طازجة يومياً تاتيكم من مزارعنا >> اجل من حوش الغنم عزيزي الزبون نضمن جودة الأرض والماء من زمزم للاستفسار والحجز الرجاء الاتصال على احد الموزعين في أنحاء العالم على الرقم المجاني 123456789 مرحباً بكم من جديد ياليت الإخوان في الكنترول يعطونا اتصال من احد المشاهدين الو الو الو فيه اتصالات يابوشدز وإلا نبدأ مع الإخوان أبوشدز : التلفون مشغول شوي اكلم الوالدة إذا قضيت حولت الاتصالات أبونديم : خذ راحك يابوشدز نسأل الأخ جنط السفينة ليه متحامل على شركة الاتصالات جنط السفينة : لا تقول ليه متحامل قل ليه كل المواطنين والمقيمين متحاملين على الشركة أبوهتون : رجاً تكلم عن نفسك ياجنط الشركة جنط : لا تقاطعن ترى بقوم احلل فواتير الاتصالات منك ابونديم : اسمع يابوهتون مستعد أعطيك الفرصة ترد بس لا تقاطع جنط لا بطفاية ابوشدز وأنت ياجنط أسلوب العرابجة مانبيه أنت في استديو منتب بمنفوحه كمل ياجنط ليه متحامل وبختصار لو سمحت لا تجيك الطفاية أنت الثاني جنط السفينة : سم يابونديم أنا متحامل طال عمرك وعمر السامعين لأني ادفع رسوم الجوال وفواتير وفي ليلة العيد يبنشر علي الكفر وابي اتصل على احد وعجزت امسك خط لأن الشبكة مشغولة إلى إن الكفر استحى على دمه ونفخ روحه وقال امش ياجنط الشركة مابه فائدة هل يعقل هذا والا وش رايك يابونديم أبونديم : والله معك حق بعدين الكفر فزع معك علشان انك جنط ولو هو غيرك تسان دقه كعابي أبوشدز : بوه اتصال احوله أبونديم : لا اردزه خل نعطي ابوهتون فرصة يرد على جنط نفضل ابوهتون أبوهتون : انت قلت ليلة العيد وتعرف في ليلة العيد يكون هناك مكالمات مهمه والشركة تسعى جاهدة انها تعطي الاتصالات المهمه الأولوية في ليلة العيد أكثر من مية اتصال على الإسعاف وكذالك الدفاع المدني أنا اعرف واحد اتصل على الدفاع المدني في ليلة العيد علشان يجون يطفون زوجته لأنها ولعت يوم رفض يوصلها للسوق هذي الحالات أهم منك أنت وكفرك أبونديم : ماتشك ياجنط إن الاتصالات قصدوا يحطونك في الموقف جنط السفينة : أنا شاك انهم حاطين مسامير بالطريق ذولا مجرمين ولا تسغرب منهم شي أبونديم : ناخذ اتصال معنا زعبور لبناني مقيم بمنفوحة ياهلا زعبور عطنا سؤالك بختصار لو سمحت زعبور : ودي اسأل راعي الاتصالات تسم وصل سعر N70 ابونديم : هذا سؤال تقدر تسأل راعي محل ابوهتون عضو منتدب مهوب حق الشغلات أبوهتون : اصبريابونديم شكل زعبور يعرفن انا قبل اشتغل بالشركة كنت أبيع جوالات مستعملة بحراج بن قاسم ياليت يازعبور تتصل علي بعد البرنامج وما يكون خاطرك إلا طيب ماودي الشهبان ياخذون سعي أبونديم : معنا متصل آخر بنت الماضي سودانية مقيمة في عليشة تفضلي وخوذي راحتك بالسؤال وهذي الكشرة والضحتسه وش حيثي ابصير مثل باقي المقدمين بنت الماضي : وش الحتسي هذا كل ماتطلع فاتورة نلقى اتصال مرة على اليمن ومرة على سوريا هذا تلاعب وإذا جينا نناقش تقولون سددوا همن ذيك الساعة نحاتسيكم أبونديم : خلاص مافيه سؤال ثاني بنت الماضي : لا ماعندي سؤال ثاني أبونديم : حاولي يانت الحلال دوري سؤال منا وإلا منا طيب إذا اختك جنبك عندها سؤال خليها تسأل بنت الماضي : ماعندي إلا اخوي اسأله إذا عنده سؤال ابونديم : لا خلاص يكفي سؤالك علشان وقت البرنامج بس تفضل ابوهتون رد على الاخت الكريمة أبوهتون : الشركة بهذي الطريقة تحاول الكشف عن الأشخاص اللي يتزوجون من خارج البلاد أنتي لاحظي وجه ابوتس إذا جت الفاتورة إذا متوتر وحاول يخفي اسم الدولة فهو متزوج منها وإذا صار عادي فمعناه انه برئ وحنا بدورنا رح نجيب لكم بالفاتورة الجاية دولة ثانية وعلى الحال في جميع الفواتير الجاية إلا أن نكشف ابوتس وهذي خدمة مجانية تقدمها الشركة للزوجات وبالنسبة للتسديد ماودنا ناخذ ونعطي معكم بالحتسي لأنكم بالنهاية رايح تسددون وانتم ماتشفون الجادة أبونديم : نأخذ فاصل إعلاني وإلا نواصل الاتصالات جنط السفينة : تسان الإعلان مثل اللي تو خل نأخذ اتصالات أحسن أبوهتون : نبي فاصل إعلاني وياليت تطول بدعاية الخضار وان حصل تسوي مرقه خضار لأني بصراحة ابي دورة المياة وانتم كرامة أبونديم : تفضل ابوهتون ماقدامك احد ثاني باب على اليمين نأخذ اتصال معنا مون إثيوبيه مقيمه في المرقب اهلين اختي مون إذا سؤالتس لأبوهتون ممكن نسجل السؤال ونعرضه عليه إذا وصل بالسلامة تفضلي مون : اتفق مع الأستاذ جنط السفينة وانا ضد استغلال شركة الاتصالات واطالب بتكوين حزب معارض لشركة الاتصالات أبونديم : مشكورة يامون والظاهر نبي ننجلد الليلة والسبه انتم يالمعارضين نشوف رأي جنط السفينة جنط السفينة : فكرة الحزب فكرة ممتازة بس لاتنسى منهم شركاء شركة الاتصالات والله إن يجمعوننا بالحاير كل اللي ابيه ببساطة من الإخوان المعارضين أنهم يفعلون جهاز الكنود ويكون لكل عائلة قناة خاصة علشان إذا نبيهم نتصل عليهم عن طريق القناة وتسذا نقدرنقاطع شركة الاتصالات وش رأيكم مهوب رأي سنع أبونديم : حرام ياجنط كل المواهب والأفكار والشركة غافله عنك ماحطوك مستشار إلا وش رأيك نجيب فاصل إعلاني جنط السفينة : اها بس أنت وإعلاناتك عطنا اتصال وإلا خل أروح انفخ كفر السيارة أبونديم : اجل نأخذ اتصال معنا كاتم الونه بنقالي مولود في النسيم تفضل اخوي كاتم عطنا سؤالك وكالعادة بختصار لو سمحت كاتم الونه : ماعندي سؤال بس رفيقكم ابوهتون طول روحوا شوفوا وش بلاه لايصير ميت الله يستر جنط السفينة : لا إن شاء الله الله يطول بعمره ويخليه لعين ترجيه بس يمكن الرجال يكثر من المعلبات وخصوصاً التونه أبونديم : فاصل إعلاني لإنقاذ أبوهتون ثم نعود اليكم خلك طبيعي واشرب لبن طبيعي خالي من الكلسترول يحتوي على فتامين c وجميع فتامين حروف الكبتل الرويبه تجدها طازجه يومياً مع السمن البقري الممتاز صحتكم هدفنا لو إن الهدف تسلل سارعوا في الحجز كمية السطول محدودة وصدق الشاعر عندما قال اه يعيني ياليلي جننتني بقرة الجطيلي أبونديم : مرحباً بكم من جديد اعزائي المشاهدين ومرحباً أبوهتون والحمد لله على السلامة أبوهتون : الله يسلمك اعتذر للمشاهدين على الإطالة بس كنت اتفق مع شركة تطوير وهذا اللي أخرني جنط السفينة : إيه هين شركة تطوير لا والله دراهم العالم اللي ببطنك عيت تطلع على سيرة أبونديم : وش الكلام هذا ياجنط بعدين ابعد ايدك عن خشمك أنت شام ريحة شينه أبوشدز : اتصال يابونديم امتسنه لا ينقطع تراي ماسكن السلتس بصبعي أبونديم : ناخذ اتصال معنا سونونو نيجيريه من مواليد العزيزية تفضلي عطينا سؤالتس سونونو : ترانا ملينا من الاتصال اللي زي وجيهكم معقوله ساعة ماتفتح لي الصفحه لا ومن زين الطبايع تأخذون بالساعة ثلاث تريل المروض تعطوننا فلوس على تحمل عثاكم أبونديم : سؤال في محله وش قصة التقنية عندكم والله لو هي على ديزل ماصار تسذا أبوهتون : الشركة قاصدة الشي تخيلوا الاتصال سريع كان محد طلع من النت بس الشركة قاصدة انه تغثكم علشان ترحون لمطابخكم وتغسلون صحونكم وتخلصون اشغالكم شفتوا وشلون نظرة الاتصالات البعيدة بعدين الاتصالات ماتأخذ كل الثلاثة ريال تأخذ ريال والباقي للمشاريع الخيرية اللي في البلد أبونديم : الإخوان يقلون قرب يخلص وقت البرنامج ياليت نأخذ الاتصالات بسرعة حول يابوشدز مهوب أنت اللي تحول حول علينا الاتصال معنا الاخت المهرة صوماليه مولودة في غبيرة حياتس يالمهرة وعطينا سؤالتس المهرة : ليش الاتصالات ماتعطي المشتركين جوال مع كل شريحة أبونديم : صدز ترى باثيوبيا يعطونك جوال مع تلفون بيت رجاحه أبوهتون : الشركة تبي تسوي الشي لكن إلى الآن مالقت جوال يناسب طموح المشتركين في عام 2008 يبي ينزل جهاز جديد فيه تكنلوجيا عاليه ومن مميزات هذا الجهاز له رجلين إذا دق عليك احد جاك يركض خصوصاً اذا كان موضوع على الشاحن انتظروا عام 2008 اللي معه الرهيب يصك عليه تراه يبي يرتفع سعره إحتمال يلقى له رجلين ابونديم : مامعنا وقت نأخذ اتصال جديد غرابيل حبشية مقيمة في الصالحية سؤالتس بختصار غرابيل : الحين وراكم متنزلون الأسعار الدولة قدرت تنزل البنزين وعجزت عنكم أبونديم : كلامه غرابيل سليم غرابيل : وانت بعد ماتشوف سعر الخضره اجل الكوسه تقول المهرة شارينه 160 ريال وإلا الدعايات اللي أنت مسوي أنت ووجهك كوسه ولبن انت لو تطمع إني ابجي اغطس راسك بسطل اللبن تسان ماضيقت صدورنا بالدعايات أبونديم : اقطع الاتصال يابوشدز وش العبدة اللغويه مانب قايل لك لا تحول علينا مثل الاتصالات ناخذ اتصال مانبي جواب من الاخوان عناد للعبدة معنا سواح تفضل الضيوف بنتظار سؤالك سواح : عندي بقرة للبيع تسام 6000 الاف أبونديم : لبنه حلو ويملئ السطل الو الو انقطع الخط في نهاية البرنامج نشكر الاخوان المشاركين والمتداخلين وكذالك المشاهدين وتصبحون على خير وششششششششششششششش صك التلفزيون أبوشدز عطنا رقم سواح اللي عنده بقرة للبيع 
|
|
#2
07-01-07, 02:07 PM
|
||||
|
||||
|
ذا متساني والله ياواحد يقعد به لاحش عرقوبه ندومه قلبي لي عوده لفصفصه الموضوع تخبر انا مواصل وموضوعك يبي له قصديره << بندول طبعا  .
|
|
#3
07-01-07, 02:12 PM
|
|||||||||||||||||||||||||||
|
|||||||||||||||||||||||||||
في اوربا والدول المتقدمه تباع القصديرة في الصيدليات مهوب عندكم يالمشافيح تاكلون القصديرة واللي ماقصد
|
|
#4
07-01-07, 02:26 PM
|
|||||||||||||||||||||||||||
|
|||||||||||||||||||||||||||
من تحاتسي انت  .
|
|
#5
07-01-07, 02:38 PM
|
||||
|
||||
|
الله شووووووووووكرن يابو نديم على الموضوع يهبـــــــــــــــــــــل
بصرااااحه بردت صدورناااا بالموضوع هذا هذي المواضيع اللي تفتح النفس كلنــــــــــــــــــااااا يد وااحده ضد ...... <<انتم ادرى هع هع هع شووووووووووكرررررررررن ابو نديم
|
|
#8
07-01-07, 03:18 PM
|
|||||||||||||||||||||||||||
|
|||||||||||||||||||||||||||
انا من حيني ضد الرجال ( الشركة ) واللي زاد الطين بله ابوهتون 
|
|
#9
07-01-07, 03:28 PM
|
|||||||||||||||||||||||||||
|
|||||||||||||||||||||||||||
المناقشات اللي صارت بينهم ذاك اليوم هي اللي عطتني فكرة الموضوع ومحلك محجوز على الراس والعين يالبنك
|
|
#10
07-01-07, 03:50 PM
|
||||
|
||||
|
وانا بعد هذا متساني بروح اذاكر تسلمتين عندي اختبار ياعمي
وارجع افصفص ماضوعك بعد مااقراه
|
|
| مواقع النشر (المفضلة) |
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
| راديو قصيمي نت | مطبخ قصيمي نت | قصص قصيمي نت | العاب قصيمي نت |
طايرتن بوهته 
العجوز القصيميه)
العرض العادي
