قبل سنتين تقريباً رحت محل المحامص ووديت كيس قهوة هرري 10 كيلو
ابغاه يحمسها ..
< مو لازم يعرفون انها هرري … لا تفصل هههه
وقلت له ارسلك ولدي ياخذها بكره .
راح له حمودي … ما رضي يعطيه القهوة
ما صدق ان حمودي ولدي
ولا صدق اني ابوه
شك اليماني انه غلطان بكيس القهوة
وخاف انه يعطيه كيس قهوة لزبون ثاني
والله ما صدق لين حمودي شغل الكام في السناب وخلاني اكلمه لايف هههه
ما ابالغ لو اقولكم انا لي سنتين عايش على الموقف ذا
روحي تقتات على الموقف ذا حتى الان
والموقف الثاني خوي حمودي لقيته عند باب بيتنا
ينتظر محمد يطلع له
قلت له تفضل يا حبيبي تقهوى
قال لا والله مستعجل .
محمد ولدي بعد اسبوع قالي يا ابوي تتذكر خويي
اول ما عرف انك ابوي
قال بإستغراب ( كيف كذا )
تلقائياً جلست اضرب رجوله اقوله يا حيوان ليه ما قلت لي من اسبوع ههههههه
تاركني اسبوع يا حقير 😂😂😂
والموقف القنبلة قبل ساعه وديت امي للمستشقى
وكتب لها الدكتور علاجات
وقالها الحين اخلي ( الولد يجيب لك العلاج من الصيدلية)
تعرفون كلمة ( الولد ) هذي خلتني امر السوبر واشتري سنكرز وتويكس ومارس .
وضبطت القهوة وولعت البخور العودة … عطتني مشاعر جميلة
اقسم بالله شغلت اغنية وردة على الشاشة .
( اول مره اشوف الدنيا . دنيا كبيرة ومش سايعاني )
والله بغيت ابوس الدكتور هههه
اكم هو شعور ساحر
وكم وهو شعور جميل
ومافيه داعي اسأل انثى عن تأثير هذي المواقف عليها
لان هذا شيء مشهور عن المرأة
ولكن بسأل الرجل
هل تفرح اذا احد اعتقد انك اصغر بكثير من سنك الحقيقي؟
وبصراحة وبدون مكابرة ؟
والانثى ماهو مدى التأثير لمثل هذي المواقف
وهل تروحين بسرعة تقولين لزوجك عن الموقف ؟