هذرة قبل الفطور
 

السلام عليكم ورحمة الله وبركاته ..



( سنى البدر + صحابه )
امانه ما تنقلون الموضوع لقسم السواليف
لأني اوعدكم سواليفي القبل فطوريات .. بالمرات الجايه احاول اخليهم عن العلاقه الزوجيه
وإلا اقولكم : اللي بعد هذي مباشره
بخليها عن تزويج الابناء .. عاد تكفون خلو الموضوع بقسم العلاقه الزوجيه

انا ترايستار <<<< وخير يا طير

كيف خير يا طير خخخخخخخخـ
انا ترايستار الحبوب .. اللي غثيت اهلي بالبيت وجيت هنا عشان افكهم من غثاني
انا اللي ذكي وجيت هنا عشان اتلهى عن مشاهدة العيشه اثناء تحضيرها

العام مدري قبل العام ..
بواحد من الرمضانات
اشتركت بمنتدى
ولقيت عندهم مسابقه
يحطونها قبل الفطور ..
ذيك العضوه اللي حاطه المسابقه عندهم ثلاث شغالات خخخخخخـ
وقبل الفطور تكون فاضيه وما عندها شغل
عاد انا ذيك الايام كنت منضبط معهم بالمسابقه
واهلي بالبيت مرتاحين ع الاخر ..
مو زي العام وهالسنه ..
صرت بعد صلاة العصر .. اجلس ثلث ساعه ..
اقرأ بالقران .. يالله يالله اخلص جزء واحد
سبحان الله يجيني النوم اذا صرت اقرأ قرآن خخخخخخخخخخخـ
يمكن هذي اللي يسمونها الخشوع والسكينه تخلي الواحد ينعس مع قرآءة القرآن
او انا عشاني اكون طالع من الدوام تعبان .. تجيني حالة فهاوة زايده .. واشتهي النوم ..
المهم : اني اليوم بعدما خلصت بس جزء واحد بعد صلاة العصر ..
عجزت اكمل الجلسه بالمسجد ..
عاد قلت ابي اروح لليت عشان انا ..
اول ما دخلت البيت صابني حالة من النشاط الزائد .. مع روايح العيشه
راح النوم : مافكرت ارجع اقرأ قرآن ..
ودخلت المطبخ .. من باب الاحساس بالمسئوليه .. والمشاركه في اعداد الفطور مع الشيخه وضحى العنزي خخخخـ حرم الشيخ الترس ..
دخلت .. وفتحت الفرن ..
لقيت به قالب قزاز .. والثاني قالب معدن ..
صكيته ومالقيت اي امكانيه للتعاون ..

فيه طاولة طعام .. ما عمرنا اكلنا عليها ..
ودايم ناكل بالمقلط ..
المهم هالطاوله عليها شغلات شبه جاهزه ..
انواع واشكال الغرضان ..
قلت : وشهو اللي ممكن اساعد في تضبيطه ..
قالوا لي .. اطبخ القهوه والشاهي على النار ..
حطيت القهوه على الماء المغلي والماء على النار .. ما شلته عنها
بصررررررررررررعه فاحت القهوه .. وانكبت وحاست الدنيا ..
طفيت النار وقلت هذي ما تناسبني الشغله ..
ابي شغله احسن
قالوا : فك كرتونه معجون طماط وحطها على الطاوه اللي تطبخ وحركها شوي شوي عشان هذي الصلصه حقت المكرونه
مسكت الكرتونه الصغيره حقت معجون طماط السعوديه ..
وعضيتها بسنوني .. وسحبت الكرتون تحت .. والزاويه باقي معضوضه بسنوني .. ومع قوة الفغصه
انشق الكرتون ومع الضغطه .. تطافر المعجون .. على الدنيا والعالمين ههههههههههـ و أول المتضررين فانيلتي النص كم ..
حطيت تالي المعجون على الطاوه .. وحركت شوي ..
وقلت .. احتريت من المطبخ .. ذبحني الحر ..
ابي اطلع ..
قالوا لي : تعال لف لنا سمبوسه بالمقلط
اجلس مقابل التلفزيون .. ولف السمبوسه بدون مشاكل .. هناك براد ..
جيت ابي الف السمبوسه ..
كانت اللحمه المفرومه شكلها حيل يهبل خخخخخخخخخـ
اشتهيت احطها بصامولي .. واحط عليها شطه
وآكلها مع ببسي بارد ..
بلا لفلفه بلا وجع راس خخخخخخخخخخـ

توني بادي الف السمبوسه ..
وتجي الشيخه وضحى وتاقف على راسي ..
قالت لي مووووووووكذا .. لف زين وإلا فكنا من شرك خخخخخخخـ
قلت لها : الشرهه علي اللي فازع معكم ..
قالت لي : وش رايك تروح للنت تشوف لنا طبخه جديده عشان تسويها لنا بكره
يدرون اني لو دخلت النت .. بترك المساعدات .. وبيرتاحون مني ..
دخلت النت ,, وقلت ابي اسولف عليكم

صراحه يا شباب : يؤسفني اني اقولكم ..
اني منبوذ من بيتنا بالساعتين اللي تسبق الفطور خخخخخخخخخخخـ

وش رايكم تحطون لي مسابقه نفس اللي كنت مشترك بها
كان وقتها حلو : قبل الفطور <<<< يحسب كل الناس عندهم شغالات كثير خخخخخخخـ زي ذيك العضوه الفاضيه
مو لازم الواحد يصير عنده شغالات ..
حنا ما عندنا ولا شغاله .. ومع ذلك انا منبوذ خخخخخخـ
يعني الشيخه وضحى تبي فراقي وما تبي مساعدتي .. يعني مو شرط الواحد يكون عنده شغاله
اذا حطيتوا مسابقه ..
استفيد اني : الاقي شغله اتلهى بها عن مغثة الناس قبل الفطور
وافتك من مشاهدة العيشه واللحم المفروم
وافتك من مقاومة المغريات اللي تصير بالمطبخ .. ويسلمون اهلي من حوستي
والاهم من هذا كله افوز ببطاقة شحن خخخخخخخـ
ياخوكم : مو ضروري بطاقات شحن
عادي تراني اقبل التبرعات النقديه خخخخخخخخـ
ولو فيه احد يبي يخرج زكاة الفطر ..
نقبل الأرز المطبوخ خخخخخخخـ
يعني يوم العيد .. ممكن الواحد يرسل لي حبه بخاري مع الرز .. وببسي عايله ..
عااااااااااااااادي ...
نقبل وندعي لكم ..

عيدكم مبارك خخخخخخخخخخـ اقصد مبروك عليكم رمضان
.. الشهر عليكم مبارك ..

اقسم بالله .. لو ماني مستحي
تقولون هالخبل دبل تسبودنا بكثر الهذره ..
كان استمر اسولف لين يأذن المغرب ..
عشان انا الحين منبوذ بالمجتمع خخخخخخخخخـ
قبل شوي كنت بالمطبخ .. وطردوني ..
والصاله : بها ناس يلفون سمبوسه ..
ومنظر اللحم المفروم بالصحن يدوخ
لكن خوفي يناقل عني خبل يمنعني من مواصلة الكتابه
وبروح اقاوم المغريات والمثيرات اللي تملأ البيت

اذا ما قدرت ..

احتمال ارجع اكتب لين يأذن المغرب ..

ادري فيه ناس يقولون : يا ترايستار استغل وقتك بالطاعات
اقولكم .. جزاكم الله خير ..
ونصيحتكم على عيني وعلى راسي
بس والله عجزت ..
مع الجوع .. وريحة الطبخ .. عجزت من جد
هالسنه الصيام 14 ساعه
انا بعد 12 افقد السيطره على عمري ويصيبني خفقان خخخخخخخخخخخـ

نصيحه :

كرتون الفيمتو .. سعره بين الـ 120 والـ 75 .. حسب العروض والنصبات اللي تصير بالدكاكين الكبار مثل العثيم وهايبر بنده
خلونا نفترض ان قيمته 75 وهذا المبلغ يجيب من العثيم او بنده حوالي عشرين كيلون من البردقان
اذا كانت نازله عليهم عروض بـ 3.5
والفيمتو والشربيتات الاخرى ..
انا قريت عنهم .. انهم يضرون بالصحه
والجسم هالسنه صايم بالحر الشديد
يعني يحتاج سوايل
لما الجسم يكون ناشف
يشفط السوائل على طول <<< مخك نظيف يالترس

من جد : عاد الجسم يشفط السوايل اللي تحتوي على مواد ضاره
عاد ليش الواحد يشتري لوغدانه مشروبات مو طبيعيه ومليانه مواد حافظه وصناعيه
الفيمتو والشربيتات الاخرى .. هي الوحيده اللي يقدر يحفظها الواحد بمكان جاف ويمكن حار لمدة طويله
عشانها مليانه مواد حافظه ..
ومليانه الوان ..

نرجع لفكرة البردقان ..
لازم الواحد يشتري بردقان ويعمله عصير فرش
بدال هالتكاليف على المواد الضاره ..

حنا بالصيف وجسمنا يبي سوايل
ومافيه مثل السوايل الطبيعي

على طاري الطبيعي : ترا مافيه احسن من الرضاعه الطبيعي للأطفال ( الوغدان )
ترا كل شيء طبيعي .. زين ..
الحين مو يقولون الحليب الطبيعي .. من صدر الام .. يخلي الطفل عنده ولاء وحنان لأمه ..
اووووما اللي ترضع ولدها من القواطي .. يصير الحنان للبقره خخخخخخـ
يعني الاطفال اللي يرضعون صناعي : تلاقيهم بعد سن البلوغ .. دايم حول مزارع الابقار ..
سبحان الله تجذبهم ريحة البقر خخخخخخخـ اقصد تجذبهم عروقهم البقريه ويصيرون يبرون ويمنحون الحنان للبقر اكثر من الأوادم خخخخخـ

نصيحه :

اي واحد عنده اطفال قريبين من سن الزواج وهم ايام طفولتهم يرضعون من حليب القواطي الصناعي
لازم يحرص كل الحرص ما يزوجهم من ناس كانوا كمان يرضعون صناعي ..

البنت اذا كانت بصغرها ترضع صناعي
لازم ما تتزوج ولد كان يرضع صناعي مثلها
عشان يمكن بالصدفه يكون حليب القواطي مصنوع من نفس البقره
ويصير الولد والبنت اخوان من الرضاع خخخخخخخخخخخخخخـ

شفتوا شلون : مافيه احسن من الطبيعي ..
سواء كان بردقان او حليب الام ..

هههههههههههههههههههههههههههههههههاي واي يا بطني وش ذي الهذره

عاد كمل لنا وش صار معك بالفطور طال عمرك خبري فيه شطانه هههههههههه

كل عام و أنا بخير

خخخخخخخخ نذالة قصدي كل عام و انت بخير

الله يعينهم عليك ..

هم صادقين ياأشتغل مثل الأوادم أو لا تشتغل..

يعني خلك سنع .. وش ماتعرف تصلح قهوه..وش تبي؟؟

ايه منتب فايد بشي بس تهذر تقل شسمة على ماقالوا بالع رادو (ask)

والمدام قالت لك دور على طبخة مير قليل فود جيت تسولف ياويلك منها :876564:

وكل عام وأنت غير منبوذ من البيت (q79)

هلا اخووووي ترس
مشكوور على الروووح الحلوه
وعلى الكتابه إللي قريتها على دفعتين من كثرتها
والله فكرة المسابقة فكره شويه كويسه بس الوقت قبل المغرب غير مناسب مو بسبب ضعف المقاومه لا بس انا بقولك على شغله والله ما احس بلذه الصوم إلا لما يجي الفطور انا جالس انتظر غض النضر عن و إش جالس اساوي اقرا قران او اتابع من البرامج إللي قبل الفطور تجي برامج جدا حلوه او قناة مكه بالتصوير المباشر
يعني شي يعلق قلبك
بس لما افتح النت قبل الفطور بالنسبه لي ما احس فيها بلذة الصووووم وإن اختلف كلامي تبقى وجهت نظر
ولا تنسى و الله بجد احس إن لك معزه خااااصه بنفسي تحياتي لك

هذا حال الدنيا وانا اخوك ..
انت مو اول ولا اخر واحد ما يقدر يكمل هذرتي خخخخخخخخـ
وانت بخير ..

فجر : هذرتي .. يمكن بس هالمره ..
يمكن ما تضبط معي .. بالجايات
الحين انا بالدوام .. خلني لين اطلع للبيت واشوف وش يصير معي
اذا طردوني وجيت للنت .. يمكن اكتب ..
عاد لو كتبت .. هالمره ابغاك تقرا الهذره كلها ..
وحاول تدخل قبل الآذان بنصف ساعه ..
احسب حسابك .. اخوك يطوّل خخخخخخخخـ