ياراحله عن عين عاشقك لاباس = يبقى مكانك في فؤادي محله
تبقين طهراً ما دخل جوفه ادناس = تبقين عزٍ ما تخضّع بذله
تبقين عطر ٍداعبه شم الانفاس = تبقين طبع ٍ ما حصل فيه خله
تبقين ورد ٍ داعبه هب نسناس = ورد ٍ فراشته طرب يرقصن له
تبقين حبٍ صادق ٍكله احساس = تبقين عين الشوق خل ٍ لخله
تبقين في عيني مثل جوهر الماس = تبقين انثى بالحلا مستقله
تبقين سر الحب ما بين الاقواس = يقراه من يقراه محد ٍ يدله
تبقين حب ٍ ما دخل فيه وسواس = ينبوع طاهر بالصفاء مشفق ٍ له
تبقين فكري والقصائد وهوجاس = تبقين شوقٍ في فؤادي يتله
تبقين وجد اللي تعرض للافلاس = كنه من الفرقا على نار مله
انا وجودي وجد من صاح يادباس = شاف المذله ما لقى مسندٍ له
حدوه رديان الجماعه على الساس = بعد المعزه صار يمشي بظله
يمشي بظل الساس ضايع ومحتاس = هذا بعض وجدي ولا هوب كله

المشاركة الأصلية كتبت بواسطة شــتآت (المشاركة 9560540) هلابك ياطايل..وحياك بعد هالغيبه الطويله مصافحه لاشك بأنها جزله..كعادتك شاعرنا صح لسانك ودام هذا المداد

المشاركة الأصلية كتبت بواسطة مجدلاوي (المشاركة 9560563) هذا بعض وجدي ولا هوب كلّه*** *** جميلة ابياتك ايها الشاعر وحياك الله..

المشاركة الأصلية كتبت بواسطة سنى البدر (المشاركة 9560992) أبيات فيها أحساس وجمال وشكوى عن غياب المحبوب صح لسانك

المشاركة الأصلية كتبت بواسطة فهد بن زيد (المشاركة 9561977) وصح لسانك ملايين ياطايل الشموخ ,, لاهنت استاذي وشاعرنا المتمكن ,, على هذا التصوير والمجاز الرائع ,, ولا غرابة هنا من سبك شاعر يجيد لغة التميز ,, دمت من الله بكل الخير ,,

وعليكم السلام ورحمة الله وبركاته



تبقين سر الحب ما بين الاقـواس
يقراه مـن يقـراه محـد ٍ يدلـه

صح لسانك
قصيده رائعه جدا
من أول بيت فيها إلى آخر بيت



انا وجودي وجد من صاح يادباس
شاف المذله ما لقـى مسنـدٍ لـه

مما يثلج الصدر أن نرى قصائد بـ هذا الفكر
ذات دلالات لروائع القصص والقصائد التي اندثرت
وتذكير بـ شخوص غيبهم النسيان
أشكرك جزيلا لـ إطلعنا عليها
تقديري واحترامي ..,