اسمع كلامي ياخال= واسمعي يام العيال
اعيالكم امانات= لا اهمال ولا دلال
لاتبدا تهاوش وتضارب= ولا الحبل على الغارب
وهذا كله شغلن خارب= الوسط هو الكمال
ان كان اخطوا حط اببالك= دفاعك عنهم اردا لك
مثل ماهم ذولا عيالك= ترى غيرك له عيال
لاتعطي طفلك سياره= يزعج به سكان الحاره
يشبك ليله مع نهاره= ابقضيها بالتجوال
يمكن مايعرف يسوق= ون عرف فهو مطفوق
يسوي حادث باول سوق= يبلا له ابن حلال
وسط الشارع يمشي ميه= غايص في وسط بوديه
ماتشوفه لولا الطاقيه= وغباره كنه خيال
يمَّا تطعيس وتجنيط= ولاَّ تخميس وتفحيط
والبواري طاط وطيط= ينطل يمين وشمال
نهاره كله والليل= دايم تغبير وتغسيل
ولاَّ تلمييع وتظليل= وانوار الوانن واشكال
ون صفقوا له جمهور= بدا عليهم يدور
ومطارد هو والمرور= حتى يصدم له رجال
وصار الفارس والزعيم= وايضا الفنان العظيم
وهو عميمن طميم= مايسوى له نص ريال
يايمه قولي للشايب= ماعاد اسوى مصايب
اتوب ونرجع حبايب= ابغى هايلوكس وجوال
او كامري آخر موديل= للتخميس وللتنطيل
مايلحقه مستحيل= دوريه لو بالخيال
هذا تفكير الشباب= اللي ضايع بالاسباب
لا حساب ولا عقاب= وهذا حصاد الاهمال
كم يتموا من فطيم= وكم اعاقوا من سليم
مابين ارجال وحريم= وكم اتلفوا من حلال
ون شافوا حادث راحوا له= وصار التجمهر من حوله
هذا التجمع وشو له= يعيق إرجال الهلال
يالله ياربي تهديهم= واتوفقهم وتخليهم
يارب لعين ترجيهم= وتحماهم من الظلال
وادعوا وقولوا آمين= ياربي بك نستعين
تنصرنا وتعز الدين= وتهدي جميع الاجيال

http://www.qassimy.com/vb/upk/mo7bqassimy.gif

صح لسانك

ولاعدمناك اخوي