قصة وقصيدة (( الدعـــــــــــــوة ))

[الفارس910]

بسم الله الرحمن الرحيم
السلام عليكم ورحمة الله وبركاته
عقوق الوالدين من الامور الكبيره التي حرمها الدين الاسلامي وكذلك من الدعوات

المستجابه دعوة الوالد على ولده

القصيده قالها شايب يدعى جحيش السرحاني في اولاده لكثرة عقوقهم فيه فقد

ماتت امهم وهم في عمر صغير ولم يتزوج لئلا تضايقهم الزوجه الجديده واعياله

منهم من تزوج وقطع وصله بابوه وشاب الاب وهرم ولم يقف معه احد منذ زواجهم

والله يمهل ولا يهمل وعقوبة العقوق كبيره لقد محى الله ابناء هذا الرجل من

الوجود فابناءه فنوا ولم يجدو ذريه من بعدهم

يقول جحيش السرحاني


قال اللذي يقرا بليا مكاتيب ************** ياللي تقرون العمى من عناكم
ياعيال ياللي تشرفون المراقيب ***********تريضوا لي واقصرو من خطاكم
خوذو كلام الصدق مابه تكاذيب ************مثل السند مضمون للي وراكم
ياعيال لا صرتو ضيوف ومعازيب ************ ترى الكلام الزين ملحة قراكم
وتروا السبابه من كبار العذاريب ************ وهرج البلاسه مايطول لحاكم
المذهب الطيب فهو مذهب الطيب **********والمذهب الخايب يبور نساكم
ياعيال ماسرحتكم بالملاهيب ************* ياعيال ماعمر المعزب ولاكم
ياما توليت القبايل تقل ذيب **************من خوف لاينقص عليكم عشاكم
وياما قطعت من الفيافي العباعيب ********** ندور من صيد البراري غذاكم
ياعيال دوكم لحيتي كلها شيب ************ هذا زمان قعودنا في ذراكم
قمت اتوكا فوق عوج المصاليب ************* قصرت خطانا يوم طالت خطاكم
عطوني القرضه عليكم مطاليب ************ عطوني القرضه جزاء من جزاكم
لابد يوم عاوياً دوني الذيب ************** بالقبر مافرق طيبكم من رداكم
مانيب فاضحكم بوسط الاجانيب ************ باعمالكم يدرون كل اقرباكم
لوكان تدرون الردي والمعاييب ************* صرتوا مع المخلوق مثل خوياكم
خوالكم بالطيب تروي المغاليب ************* ولو تتبعون الجد محدا شناكم
وش علمكم ياتاركين المواجيب ************* حسبي عليكم هالردى وين جاكم
يالله عسى اعماركم شمسها تغيب ********** يعتم قمركم ثم يظلم سماكم
ياعلكم في حاميات اللواهيــــــب ************ ياللي على الوالد خبيث لغاكم
شفت الجفا والحيف والغلب والريب *********** بطلوعكم لا بيض الله قراكم
اخسو خسيتو ياكبار اللغابيب ************* اهبو هبيتو يقطع الله نماكم

منقول مع التحيه
ولاحول ولاقوة الا بالله
اخوكم الفارس910

[المهاجر]

الله يعطيك العافية

[ضي تبوك]

الله يعطيك العافية اخوي

[النجديه]

قصه مؤثره جداَ

تسلم يديك ياخوي على هالقصه والقصيده الرائعه

ويسلم هالاختيار المميز في القصص

بس ياخوي انا سمعت القصه ان جحيش السرحاني كان متزوج ثلاث حريم وكل ماراح لم وحده منهم طردته وفي ليله من اليالي كان

هو وحريمه وعياله نايمين في وادي يسمى سلاحيب , ويوم قام الصبح وما يحصل احد حوله من عياله ولا هم شادين ومخلينه الحاله

ولا هذي مناقع الماء وهذي اثارهم .. ويقول هالقصيده وهي تقريباَ نفس اللي ذكرتها بس مع اختلاف بسيط



قال اللذي يقرا بليا مكاتيب = ياللي تقرون العمى من عناكم
ياعيال ياللي تشرفون المراقيب = تريضوا لي واقصرو من خطاكم
خوذو كلام جحيش مابه تكاذيب = مثل السند مضمون للي وراكم
ياعيال لا صرتو ضيوف ومعازيب = ترى الكلام الزين ملحة قراكم
المذهب الطيب فهو مذهب الطيب = والمذهب الباير يبور نساكم
ياعيال ما سرحتكم بالواهيب = وياعيال ماعمر المعزب ولاكم
وياعيال ما ضربتكم بالمشاعيب = ولا سمعو الجيران لجة بكاكم
من حبكم أرطب القلب ترطيب = يفز قلبي يوم يبكي حداكم
يا ما تسلوعت القبايل تقل ذيب = من خوف لايقصر عليكم عشاكم
ويا ما قطعت من الفياض العباعيب = ادور من صيد البرايا غداكم
وياعيال هاكم لحيتي كلها شيب = هذا زمان قعودنا في ذراكم
قمت أتوكا فوق عوج المصاليب = وقصرت خطانا يوم طالت خطاكم
ردو لي القرضه عليكم مطاليب = رود لي القرضه جزاء من جزاكم
لابد يوم (ن ) عاوي دوني الذيب = بالقبر ما أفرق طيبكم من رداكم
مانيب فاضحكم بوسط الاجانيب = بفعولكم يدرون كل قرباكم
لو كان تدرون الحياء والمعاييب = صرتو مع المخلوق مثل اخوياكم
خوالكم بالطيب ترو الاغاليب = لو تتعبعون الجن ما حد شناكم
وش علمكم يا ساهجين المواجيب = حسبي عليكم هالرداء من وين جاكم
يا علكم في حاميات اللواهيب = ياللي على الوالد خبيث لغاكم
شفت الجفاء والحيف والظلم والريب = بطلوعكم لا يسر الله قراكم
يا عيال بعتوني بصفراء العراقيب = ماهي حقيقه سود الله قراكم
نصحتكم وأسندت وادي سلاحيب = وشاهدة بالبيداء مدافيق ماكم
مار عسى نساكم لاتحمل ولا تجيب = ولا حد (ن ) من البزران يمشى وراكم
اهبو هبيتو ياكبار اللغابيب = أخسو خسيتو يقطع الله نماكم

ويقال فعلاَ ان هالعائله ما عاد لها وجود قطع الله نماهم

يعطيك العافيه ياخوي

واحنا في انتظار جديدك القادم

وتستاهل القصيده الرائعه التثبيت

[كاتم الونة]

الله يكفينا الشر..

فعلا هذه اشهر قصائد الهجو في الابناء من اثر العقوق

وقد استمعت لها في شريط.. وهي مؤثره جدا جدا

اخسو خسيتو ياكبار اللغابيب **اهبو هبيتو يقطع الله نماكم
/
/
اعوذ بالله من العقوق ومن الخذلان.

/

الفارس910

لاهنت يالغالي..

مميز يابعدي

تحية ومحبة وتقدير

[المزدادعلما بجهله]

الله يعطيك العافية...
والله مؤثر بالفعل ,ياسبحان الله كيف يفعل دعاء الوالدين...

الله يكفينا شر العقوق....


.

[برساوي]

مشكووووووووووور

[المشااااكس]

بسم الله الرحمن الرحيم

:::مشكووووور:::

[أخت الرجال الطيبين]

يعطيك العافية أخي الفارس قصة مؤثرة ..أعاننا الله وأياك على بر الوالدان

[الفارس910]

مشكورين على المرور الطيب والله يقدرنا على ماهو مفيد

الفارس910

[altaeb1]

بس اللي أعرفه أنا انه القصيدة المذكورة لشخص يسمى فريج الفريج ويلقب بين العرب بابن رياش

وكان هذا ابن رياش قاضي عرب والقصة التي ذكرت مظبوطة وينقصها سبب القصيدة

وهو انه عياله واكبرهم اسمه علي راحوا يرودون ارض بسنين محل وتركوا شايبهم وحريمه

بالبيت وتواعدوا مع الحريم انه ان ما رجعوا لديرتهم يوم الفلاني انهم يهدوا البيوت ويلاقوهم في

المكان الفلاني وقاموا الحريم ليلة اليوم المذكور على الوعد تفقوا على الرحيل وترك الشايب

شايب وجع راسهم عطوني اكل عطوني مي وجع راسهم وقالوا في ما بينهم ان سالني عنه علي

واخوانه نقول انتم طلعتوا من عندنا وهو مات وين نبي نلحقكم ما ندري وين انتم

ويوم رحلوا الحريم وشالوا البيوت من تاني يوم يمر ناس من عرب تانية يدورون ابن رياش على

شان انهم مختلفين ويبون يتقاضون عنده ويوم شافوه على الحال وعرفوا انه الحريم هدوا البيوت

ورحلوا وتركوه طلبو منه ياخدونه عند علي واخوانه لكنه رفض وقالهم اذا انتم فيكم خير لله تودون

هل القصيدة لعلي واخوانه

والقصيدة اللي ذكرتها ينقصا ابيات كثيرة واني اذكر بعض الأبيات منها ولاتحضرني القصيدة كاملة
يقول فيها

ياعيال ما ضربتم بالمصاليب,,,,,,,,,,,,,,,,,,, ولا سمعت الجيران لجة بكاكم

حفيت قدامي كما حفيت الذيب ,,,,,,,,,,,,,,,,,,, وخليت لحم الريم يخالط عشاكم

عسى نساكم لا تحمل ولا تجيب,,,,,,,,,,,,,,,,, ويبقوا رماوه وعايشين بلاكم

وعسى قمركم لا يظهر ولا يغيب ,,,,,,,,,,,,,,,,وشمسكم مطفية ومعتم سماكم

ولازال هناك ابيات كثيرة ولاكن لا تحضرني الأن ارجوا السموحة

[احبكم يالقصمان]

القصيدة محزنه ومؤثرة في نفس الوقت .
بصراحه كل من سمعها من تأثر بها .
الله ينفع بها .
هي عبره لمن يعبر والسعيد من وعظ بغيره .