|
ابغي طقاقه من فترة ما هيب بعيدة كنت عند سكرتير التحرير عبدالله الراجح معزوم على كوب شاهي وكان عبدالله يرتشف كوب من الشاهي ((يعني رايق)) وقام يناظرني ويبتسم عاد قلت له وش فيك تبتسم؟! قال تصدق يا رفيع أفكر أتزوج طقاقة ((ما قلت لكم رايق))أنا بصراحة عدلت جلستي وشديت انتباهي له.. طبعا انا جتني حالة ذهول من طلبه وربي منيب مصدق عبدالله يقول هالحكي. اللي نعتبره العاقل. الفاهم يقول كذا قلت يا عبدالله أنت اتكلم من جدك قال إيه اتكلم من جدي وش فيها الطقاقة ما هيب بشر؟ قلت له إلا إذا على الطقاقة إلا بشر ونص بس الحكي عليك أنت فديت خشتك بالنسبه للطقاقة ربع بشر إلا ربع طار يعني لو تجي لطقاقه وتقولها أبغى أخطبك. أربطت هالبلاستك ((الحامي من وجع الأصابع لا جات تطبل)) حول أصابعها اللي تنلف بحرير وكفختك فيه كف على وجهك كنها داخله على أغنية يا زين اللي حضرت. ولا خلصت جابت الطبل وعلقته برقبتك وخلتك مثل حسين عبدالرضا في مسلسل بساط الريح حقهم ذا ومغير تهز وسطك. وهي تكفخ.. وربي أن تبسطك وتبتدي تبتكر أغاني رزف جديده على بطنك نعنبوا دارك ما لقيت في هالدنيا كلها غير طقاقة اتزوجها. يعني يوم شطحنا نطحنا.. يعني هالدكتورات وهالمدرسات ومديرات البنوك ما هن تارسات عينك؟!.. رحت على طول وشقحت تبي طقاقة؟! ما عندك نظر؟ أقول اعقل بس وتعوذ من ابليس لا تسمعك طقاقة من إياهم وتقول هذا اللي عاد ناقص ما بقا إلا أنت بعد جاي تبغا تناسبنا. يا أخي اعقل الناس مقامات. وبعدين حتى لو طق في عقلي طار وطاوعتك ورحت معك اخطب لك طقاقه وش اقولها مهنتك؟ اقولها انك سكرتير تحرير وعندك شهادة جامعية؟! ((الله لا يفضحنا بس )). وربي أستحي صراحة مالي وجه أقولها لأنها على طول بتعرف انك داخل على طمع وبتقول من عقب الطِيران والطبول آخذ جامعي أعوذ بالله تف من طارك يا شيخ يعني ما تكل عيش الأيام ذي وحتى لو حبيت أزين صورتك قدامهم وأقولهم انك كنت تسوق باص الطقاقات الأصفر بين الرياض والدمام وتنظف الفصفص من تحت كراسيهم.. وتنظف بقايا الديرما من على سنادات الراس والسبه مطبات الشرقية وترش خمس غراش عطر ثلاث خمسات. بعد كل مشوار. وتشيل لهم البقشة حقت الطِيران حتى ذي ما تشفع لك لأنهم بيسألوني عنده شهادة خبرة؟.. وش أقول؟.. أقول خريج جامعة دنفر بأمريكا مالت علي وعليك طبعاً زي لامالت حقتهم اللي في العروس بس ذي ببلاش تكفا يا عبدالله ساير الدنيا وأنا خوك ذي طقاقة ما هيب لعب.. ولا هي جامعية طايحن حظها عشان تقول ما يبغالها تفكير. طق الباب وخذها والمنه لك كافي انك بتنشلها من البطاله (( عندنا اربعين الف شهاده جامعية لو نجمعها ونبيعها على اشارات المرور بدل كراتين المناديل كان دخلنا اربعين الف ريال ربح )) المهم زوجه تكون على مستواك يعني دكتوره، مدرسة، باحثة حتى لو خريجة معهد تقني يالله مشي الحال لكن طقاقة ذي كبيرة مره؟؟!! نعنو دارك ليلتها براتبي أنا وأنت في سنة مع بدل السكن والعلاوات تصدق أن راتبها في شهر كثر راتب وزير الخزانة الأمريكي جيفرون..ديناسون في سنة "من ذا جيفرون؟!" المهم عاد يوم شفته ضايق صدره من ردي قلت له خلاص أنا أوعدك أدور لك واحده من ذا الطقاقات الخويات. مشي حالك فيها لين الله ييسر أمورك بطقاقة سوبرتن. ويوم شفت ربي هدا عبدالله وشاف أنه ماهوب كفو يوصل مواصيل الطقاقة. ضاق صدره وقام يدور له على دكتوره على قده.. واتبع المثل اللي يقول وش حدك على الدكتوره قال غلا الطقاقة!!. الأكيد أن الطقاقة خذت حيز كبير من تفكيري وتفكيره. صراحة شغله تجنن ودخلها عالي مره.. وعلى طاري الدخل تقول الطقاقة الكبيرة فيفي عبده طبعاً هم يسمونها العالمة وحنا نسميها الطقاقة الفرق بس أن ذيك تطق وترقص. أما طقاقتنا تطق وتجر لها حجرين شيشه وأحياناً لو تخليها لآخر الليل تطق تقلبها بلدي.. المهم أن فيفي عبده طقاقتنا الكبيرة القديرة تقول ((هما الناس حاسديني على إيه؟ هما فاكرين بدخل كام في اليوم؟ إيه ده الله يحوس مرايركو هو الواحد ما يعرفش يتهنا بفلوسه؟! وعلى إيه دول كلهم"15" ألف جنيه في الحفلة .((اسكتي بس لا يسمعك مدير تحرير فواصل ويهد شغلته ويشتغل عندك مدير تحرير طِيران وطبول)) وفيه أحد كتاب النقد الفني المصري واللي هو سمير الراوي يقول خذ بالك أوع توئع في إيد اتنين ويتخرب بيتك سدئني دي نصيحه تاخدها أنت الربحان مش حتاخودها استلئا وعدك حاينفشو وشك.. وهما وزير الداخلية وصبي العالمة يعني صبي عالمة حط قوته قوة الوزير على كذا فيفي عبده تمشي وراها موتوسيكلات وصورها توزع في الوزارات. على حبه ونص وتدرس في مدارس الهرم الخيرية. المهم ما بغى أطول تعالوا أقولكم بعض المعلومات اللي يمكن تخفى على كثير منكم: هل تعلم أن دخل الطقاقة في ليلة واحدة تتراوح من 30 إلى 90 ألف ريال ((وربي ناقصها جواز دبلوماسي)) هل تعلم أن الطقاقة لاجات تقول لا مالت على فلان تاخذ على كل ميله "500" ريال وتتراوح ميلاتها اليومية من 30 إلى 50 ميلة ((يا ويل كبدي على ثلاث ميلات أسدد بها قسط السيارة)) وهل تعلم أن الطقاقة تصرف 30 كيلو فصفص و3 كيلو علوك وثلاثه كيلو ديرما كل شهر ((أصدق وربي من أشوف الطقاقة بالديرما حقتها أقول معاد ناقص غير قطعة شيز وقطعة خس وقطعة لحمه وتصير شيز برقر طق)). وهل تعلم أن الطقاقة تطق في الليلة الواحدة بيدها على الطار فوق 80 ألف طقه ((يعني لو هي تطق وجهي الطق ذا كله يمدي وجهي انطبع بكف ايدها)) وهل تعلم أن حرارة ايد الطقاقة بعد كل عرس تصل إلى 70 درجة مئوية (( على كذا لو يدرون عنها منظمة اليونسكو لحماية البيئة أن يوجهون لها تهمة توسع طبقة الأوزون )) في النهاية .. أطلب لي ولعبدالله الراجح.. طقاقتين زوجات توهن ناشئات أمامهن مستقبل لايهم المواصفات الجمالية أو الجسمانية أهم شيء بكامل لياقتها البدنية وطبقة صوتها امبي فاير وإيدها شغالة.. وسلامتكم. ملاحظه // نصيحه للي ترغب في انها تشتغل طقاقه وهي عندها شهاده جامعيه وبأمكانها تشتغل مدرسه تغبيها لنها لو شافتها الطقاقه الريس بتناظرها من فوق لتحت وخاصه لو انها ساكنه في الرياض وبتقولها ليه مالقيتي مدرسه في الزلفي؟؟؟ ملاحظه ثانيه / الزلفي تبعد عن الرياض 300 كيلو ملاحظه ثالثه / ولا خلاص مابغا اكره احد في التعليم وعقبه الجامعات عندنا يقلبونها اقسام الفن الفيزيائي وتبعياتها من طيران وطبول .بأشراف الدكتوره زبيده وام مشعل ملاحظه اخيره // زبيده ذي طقاقه بدرجة وزير ولا وربي بدرجة وزاره |